حمو بيكا: أنا موجوع وتعبان .. كفايه .. انا بني آدم زي زيكم والله .. ربنا خلقني بقلب احس بيه

كلمات من قلب امتلأ بالمعاناة، خرجت من بين الضلوع لتصرخ في وجوه المتنمرين والحاقدين، هل يُعاقب حمو بيكا لأنه لظروف ما .. لم يستطع أن يتعلم أو يقرأ ويكتب ، هل يُعاقب لأن الله أكرمه وفضله ورزقه ، لماذا يتنمرون علي بيكا، وأكثر المتنمرين لا يدرون معاناته ويحكمون عليه بظاهر الأمور لا بباطنها.

في منشور كتبه عبر صفحته الرسمية على موقع التواصل الاجتماعي "فيس بوك"وجه مطرب المهرجانات حمو بيكا رسالة إلى المتنمرين عليه قال فيه: "يا جماعة ياريت نفهم إن أنا موجوع وتعبان، اتنـمر عليا مرة واتنين وتلاته ولسه فيه ناس بتتنمر عليا، لحساب مين كل ده، انا بني آدم زي زيكم والله".

ووجه حديثه لنقيب الموسيقيين قائلاً: "الأستاذ هاني حضرتك كنت في ندوة واتنـمر عليا وانت اخويا الكبير، وأنا مسامح والله، بس كفاية بالله عليك انا اه مش بعرف اقرا واكتب بس ربنا خلقني بقلب احس بيه، كفاية تجرحوني، مش كل واحد يبقى عنده سلطة يتحكم في البشر ؟".

وتابع بيكا: "أنا من 5 سنين بعاني وبعافر، بس هما شايفين ان إحنا مبسوطين وفرحانين، لا أنتوا اللي مبسوطين وانتوا اللي معاكم ومعاكم وعندكم كتير بس عمرنا ما بصينا ليكم، هو ليه لما يكون معايا حاجه حد يبصلي فيها و عايز يأخدها ؟! ده غير مرضي اللي بدفعله في الشهر كتير اوي ..حسوا بيا ، لو غلطت في حاجه تعالي و حاسبني و علمني الصح من الغلط ..فاتح بيت و عندي أسرة و عندي مسؤوليات كتير محدش يعلم بيها إلا ربنا ،،ارجوكم كفاية"

واختتم بيكا منشوره قائلا: "ياريت تحكموا بينا بالعدل زي ما ربنا سبحانه و تعالى بيقول : " وَإِذَا حَكَمْتُم بَيْنَ النَّاسِ أَن تَحْكُمُوا بِالْعَدْلِ " .. وكفاية تنمر عليا و افتكروا كلام ربنا" :يَا أَيُّهَا الَّذِينَ آمَنُوا لَا يَسْخَرْ قَوْمٌ مِنْ قَوْمٍ عَسَى أَنْ يَكُونُوا خَيْرًا مِنْهُمْ " .. وفي النهاية شكراً لكل حد بيدعمني و بيحبني

يذكر ان حمو بيكا قد وجه رسالة إلى نقيب الموسيقيين الفنان هاني شاكر خلال استضافته ببرنامج "حبر سري" الذي تقدمه الإعلامية أسما إبراهيم عبر شاشة "القاهرة والناس" قال فيها: "أنا بطلب منك أنت اللي تيجي تقعد في لجنة الاختبارات في النقابة دي وتجيب كل بتوع المهرجانات وتمتحنا، ولو سقطتني هبقى راضي وفرحان"